ئەڤرۆ ل بارەگایێ ژوورا بازرگانی و بیشەسازیا دهۆکێ، ب بەشداریکرنا بەرێز شکری جەمیل سەرۆکێ ژوورێ و بەرێز بریندار حیدەر قائمقامێ قەزا دهۆکێ و ڕێڤەبەرێن گشتی یێن (چاندن، وەبەرهێنان، گەشتوگوزار)، دگەل شارەزا و وراوێژکارێ ڕێکخراوا VNG International کۆمبوونا فەرمی یا جڤاتا گەشەپێدانا بەردەوام (Sustainable Development Board) هاتە ئەنجامدان.
د ڤێ کۆمبوونێ دا، جەخت ل سەر گرنگیا هەماهەنگیێ د ناڤبەرا سێکتەرێن جۆدا ب مەبەستا بڕێڤەبرنا ئابووریا پارێزگەها دهۆکێ بەرەڤ قۆناغەکا پێشکەفتی هاتە کرن.
د پەیڤا دستبێکێ دا، سەرۆکێ ژوورا بازرگانی دیار کر کو گەشەپێدانا بەردەوام بێ ئێکگرتنا سێکتەرێن گەشتوگوزار، چاندن، وەبەرهێنان و بازرگانی سەرکەفتی نابیت. ڕوونکرد ژی کو گەشتیار پێدڤی ب بەرهەمێ ناڤخۆیی و خزمەتگوزارییانە، جووتیار پێدڤی ب وەبەرهێنەر و کارگەهانە، و وەبەرهێنەر ژی پێدڤی ب ژینگەکا ئاسان یا بازرگانییە وکێمکرنا روتینی لەوما ئامادەکرنا لێکتێگەهشتنەکا ئێکگرتوو پێدڤیەکا بنەڕەتییە.
گرنگترین خاڵ و پێشنیارێن د کۆمبوونێ دا هاتینە بەحسکرن:
پێکهێنانا تیمەکا ئابووری یا بچووک (Economic Task Force) د ناڤبەرا ژوورێ و ڕێڤەبەریێن پەیوەندیدار دا بۆ ئاسانکاریکرنا ڕێکارێن کەرتێ تایبەت.
ئامادەکرنا نەخشەیەکا وەبەرهێنانێ یا روون بۆ گرێدانا گەشتوگوزارێ ب سێکتەرێ چاندن و پیشەسازیێ ڤە.
لێکگهورینا ئاخفتن و ڕاسپاردەیان بۆ پرۆژەیێن کارا دا کو د دەمەکێ دیارکری دا ئەنجامێن باش بۆ وەلاتیان و کەرتێ تایبەت ب دەست بهێن.
ژوورا بازرگانی و بیشەسازیا دهۆکێ بەردەوامە د پشتەڤانیکرنا بزاڤێن گەشەپێدانا ئابووری دا، دا کو دهۆک ببێتە سەنتەرەکێ هێزا بازرگانی و وەبەرهێنانێ ل دەڤەرێ دا.