د چارچوڤێ بزاڤ و چالاکیێن بەردەوام یێن ژوورا بازرگانی و پێشەسازییا دهۆکێ بۆ پێشڤەبرنا کەرتێ پێشەسازی و بازرگانی ل پارێزگەها دهۆکێ، بەڕێز شکری جەمیل نووری، سەروکێ ژوورا بازرگانی و پێشەسازییا دهۆکێ، دگەل بەڕێز ئایدن عەبدولرەحمان، رێڤەبەرێ ژوورێ، سەرەدانا کۆمپانیا گشتی یا پێشەسازییێن ئاڤاکرنێ (الشركة العامة للصناعات الانشائية) یا سەر بە وەزارەتا پێشەسازییێ ل بەغدا کرن.
شاندێ ژوورێ ب گەرمی ژلایێ د. موهەننەد مەهدی، رێڤەبەرێ گشتی و سەروکێ جڤاتا کارگێری ل کۆمپانییێ، ڤە هاتە پێشوازیکرن.
د کۆمبوونێ دا سەروکێ ژوورێ بەحسێ رەوش و پێشکەفتنێن کەرتێ پێشەسازی ل پارێزگەها دهۆکێ و دەرفەتێن وەبەرهێنانێ ل دەڤەرێ کر. هەروەسا ب شێوەیەکێ فەرمی داخوازا بەشداریکرنا پێشانگەها نێڤدەوڵەتی یا (Dedex Expo) پێشکێشی وەزارەت و کۆمپانیا نافبری کر، کو بڕیارە ل ڕێکەفتی ٣ تا ٥ـێ کانوونا ئێکێ ٢٠٢٦ ل پارێزگەها دهۆکێ ڤەبیت، داکو بەرهەم و شیانێن نافخۆ یێت دهۆکێ ببینن.
ژلایێ خۆ ڤە سەروکێ جڤاتا کارگێری خۆشحالیا خۆ ب ڤێ سەرەدانێ دیارکر و پشتەڤانیا خۆ بۆ خورتکرنا پەیوەندیێن بازرگانی و پێشەسازی دگەل پارێزگەها دهۆکێ دووپات کر.


