د چارچووڤەیا پتەوکرنا پەیوەندیێن فەرمی و پاراستنا ماف و بەرژەوەندیێن بازرگان و خودان کارێن پارێزگەها دهۆکێ دا، بەڕێز شکری جمیل نوری، سەرۆکێ ژوورا بازرگانی و پێشەسازییا دهۆکێ، دگەل بەڕێز ئایدن عەبدولڕەحمان حاجی، رێڤەبەرێ کارگێڕیێ یێ ژوورێ، ل بەغدا سەرەدانا بەڕێز فرهاد ئەتروشی، جێگرێ سەرۆکێ پەرلەمانا عێراقێ، کر، کو ب گەرمی پێشوازی ل شاندا ژوورێ کر.
د ڤی دیدارێ دا چەندین بابەتێن گرنگ یێن ئابووری و بازرگانی و پێشەسازی هاتنە گوتوبێژکرن، و دووپاتی ل سەر ڤان خالان هاتە کرن:
- پێدڤییا هەماهەنگییا د ناڤبەرا دەستهەلاتا تشریعی ل پەرلەمانا عێراقێ و ژوورا بازرگانی دا بۆ چارەسەرکرنا ئاستەنگێن بازرگانی و ئاسانکرنا رێکارێن گومرگی و چارەسەرکرنا کێشەیێن بانکی و حەوالەیان بۆ بازرگانان.
- پێشکێشکرنا پێشنیاران بۆ چێکرنا ژینگەهەکا یاسایی یا گونجای بۆ پشتەڤانیکرنا کەرتێ تایبەت و پێشخستنا هژمارەکا پرۆژەیێن ئابووری ل سنورێ پارێزگەها دهۆکێ.
سەرۆکێ ژوورێ داخواز ژ جێگرێ سەرۆکێ پەرلەمانی کر کو وەکو دەستهەلاتا تشریعی گرنگییەکا تایبەت بدەنە دەرئێخستن و راستڤەکرنا یاسا و بریارێن پەیوەندیدار ب پێشەسازی و بازرگانی و پاراستنا بەرهەمێ ناڤخۆیی، دا خزمەتەکا مەزنتر ژ ئابوورییا دەڤەرێ و عێراقێ ب گشتی بهێتە کرن.
بەڕێز فرهاد ئەتروشی ژ لایێ خۆ ڤە ئامادەییا تەواو نیشان دا بۆ پشتەڤانیکرنا هەمی ئەو پرۆژە و پێشنیارێن یاسایی یێن کو دبنە ئەگەرێ ڤەکرنا دەرگەهێن نوو ل بەردەم گەشەپێدانا ئابووری ل دهۆکێ.