ب ئامادەبوونا نوونەرێ ژوورێ رێزدار ئەڤراز بهجت، ئەندامێ ژوورا بازرگانی و پێشەسازییا دهۆکێ، ژوورێ پشکداری د ئەڤێ روویدانا ئەکادیمی و کارسازیێ دا کر، یا کو زانکۆیا پۆلیتەکنیک دهۆک (DPU) ب فەرمی میڤاندارییا ئێکەمین پێشبڕکییا نێڤدەوڵەتی یا داهێنانێ (Start Cup Competition) کری، ل ژێر چاڤدێرییا وەزارەتا خاندنا بلند و ڤەکۆلینێن زانستی.
پێشبڕکی ل ژێر درووشمێ "ژ هزرێن خۆجێی بۆ کارتێکرنا جیهانی: داهێنانا دەرڤەیی سنووران بۆ کۆمەڵگەهێن بەردەوام و گەشەپێدانا هەرێمی" هاتە ئەنجامدان، و تێدا نەهـ تیم ژ حەفت زانکۆیێن کوردستانێ و دوو زانکۆیێن ئەوروپی هزر و پڕۆژەیێن خۆ یێن کارسازیی پێشکێش کرن:
- زانکۆیا پۆلیتەکنیک دهۆک
- زانکۆیا ئاکرێ یا زانستێن کرداری
- زانکۆیا زاخۆ
- زانکۆیا دهۆک
- زانکۆیا پۆلیتەکنیک هەولێر
- زانکۆیا پۆلیتەکنیک سلێمانی
- زانکۆیا گەرمیان
- زانکۆیا (UNINT) یا ئیتالی
- زانکۆیا مورسیا یا ئیسپانی
پڕۆژە پێشکێشی لژنەیەکا هەڵسەنگاندنێ یا ژ پێنج ئەندامان هاتنەکرن، کو نوونەراتییا کۆمەڵگەها مەدەنی، ئیدارەیێن خۆجێی، کەرتێ بازرگانی و پیشەسازی و دەرچوویێن زانکۆیێ دکەن.
ئەڤ روویدانە قۆناغەکا گرنگە ژ پڕۆژەیێ (RISE) یێ سەر ب پرۆگرامی (Erasmus+) ڤە، کو ژلایێ ئێکەتییا ئەوروپا ڤە پالپشتییا دارایی لێ دهێتە کرن و ژلایێ رێکخراوا (UNIMED) ڤە دهێتە سەرپەرشتیکرن. پڕۆژە ژ شوباتا ٢٠٢٥ دەستپێکری و هەتا کانوونا دووێ ٢٠٢٧ دێ بەردەوام بیت، ب ئارمانجا نێڤدەوڵەتیکرنا زانکۆیێن کوردستانێ و باشتر ئامادەکرنا دەرچوویان بۆ بازاڕێ کارێ یێ پاشەڕۆژێ.


