ل ٤ێ ئۆکتۆبەرا ٢٠٢٦ێ، ب سەرپەرشتیا یەکێتیا ژوورێن بازرگانی و پێشەسازییا هەرێما کوردستانێ و ب هەماهەنگی دگەل ئەنجومەنێ کاری یێ رووسی – عێراقی، کۆربەندا ئابووری یا نێڤبەرا هەرێما کوردستانێ و کۆماریا رووسیایا فیدراڵ ل بالەخانا ژوورا بازرگانی و پێشەسازییا هەولێرێ هاتە سازکرن.
دەستەیا ژوورا بازرگانی و پێشەسازییا دهۆکێ ب سەروکاتیا رێزدار سەرۆکێ ژوورێ و ب ئامادەبوونا رێزدار ئەڤراز بەهجەت، ئەندامێ ئەنجومەنێ کارگێری یێ ژوورێ، دگەل ژمارەکا بازرگانێن پارێزگەها دهۆکێ و ئیدارا سەربەخۆیا زاخۆ، بەشداری د کۆربەندێ دا کر.
سەرۆکێ ژوورێ د کۆتاراخۆ دا ئیشارەت دا کو پارێزگەها دهۆکێ ب ئەگەرا پێگەهێ خۆ یێ جیۆپۆلیتیکی و لۆجیستیکی و کەفتنا وێ ل سەر سنۆرێن نێودەولەتی، دەرگەهێ سەرەکی یێ بازرگانییە بۆ تەواوی هەرێمێ و عێراقێ. هەروەسا گۆت:
پەیوەندیێن مە دگەل وەلاتێ رووسیا مێژووی و دۆستانەنە، و ئامانجا مە ئەڤرۆ ئەوە ڤان پەیوەندییان برێگا دەرفەتێن بازرگانی بەرفرەهتر بکەین.
ئارمانج ژ سازکرنا ڤێ کۆربەندێ پەرەپێدانا پەیوەندیێن ئابووری، راکێشانا وەبەرهێنەرێن رووسی بۆ هەرێمێ و ئاڤاکرنا پرێن پەیوەندیێ د نێڤبەرا بازرگانان دا بوو. ل دوماهیا کۆربەندێ، هەڤدیتنێن راستەوخۆ (B2B) د نێڤبەرا بازرگانێن دهۆکێ و کوردستانێ دگەل خۆدان کۆمپانیا و وەبەرهێنەرێن رووسی برێڤە چوون، بۆ دروستکرنا هەماهەنگی و پرۆژێن بەرهەمدار ل پاشەرۆژێ.