ل ئەلمانیا، شاندەکێ ژوورا بازرگانی و پێشەسازییا دهۆکێ دگەل شاندێ ئێکەتیا ژوورێت بازرگانی و پێشەسازییێت هەرێما کوردستانێ سەرەدانا کومپانیا جیهانی یا (SAP) کر. ئەڤ سەرەدانا مەیدانی ل چارشەمبییا ٢٨ی تشرینا ئێکێ ٢٠٢٦ ل باژێرێ بەرلینێ ئەنجام دا، د چوارچۆڤەیا سەرەدانا شاندی یا فەرمی بۆ ئەلمانیا دا.
شاندێ ژوورێ پێکهاتبوو ژ سەرۆک و جێگر و ژمارەکا ئەندامان و بازرگانێن دهۆکێ. کومپانیا (SAP) ئێک ژ مەزنترین کومپانیایێن دەستپێشخەر و پێشەنگێن جیهانێ و ئەلمانیایە ل دەڤەرا تەکنەلۆژیا سیستەمێن کارگێری و نەرمەکالایان (Software).
ل دەمێ سەرەدانێدا، شاندێ ژوورێ ژ نێزیک ئاگەهدارییا دوماهیک پێشکەفتنێن تەکنەلۆژی و چارەسەرییێن دیجیتالی بوو بۆ رێکخستنا کەرتێ بازرگانی و کارگێری. ئارمانجا سەرەدانێ سوودوەرگرتن بوو ژ ئەزموونا جیهانی بۆ دیجیتاڵکرنا ئابووریی و پشتەڤانیکرنا کومپانیا و بازرگانێن پارێزگەها دهۆکێ و هەرێما کوردستانێ.